Friday September 21, 2018 |

सुपथ पसलले दैनिक उपभोग्य वस्तु सस्तियो

featured-news

काठमाडौं- सूपथ मूल्य पसलमा सस्तो मूल्यमा दैनिक उपभोग्य वस्तु बिक्री भएपछि खुला बजारमा केही सामानको भाउ सस्तिएको छ। सरकारी स्वामित्वका साल्ट ट्रेडिङ कर्पोरेसन (एसटिसी)ले चिनी, दाल, पिठो, तेललगायत दैनिक उपभोग्य वस्तु सस्तोमा बेचेपछि ती सामानको भाउ बजारमा केही सस्तो भएको छ।

यस क्रममा खुला बजारमा व्यापारीले किलोमै ७० रुपैयाँ नाफा खाएर सामान बेचेको तथ्य पनि बाहिर आएको छ। बजारमा २ सय ७० रुपैयाँ किलोमा बिक्री भएको रहरको दाल एसटिसीले २ सय रुपैयाँमै बिक्री गरेपछि व्यापारीले मूल्य घटाएर २ सय रुपैयाँ किलोमा झारेका छन्। बजारमा सरकारी नियन्त्रण नहुँदा व्यापारीले किलोमै ७० रुपैयाँ नाफा खाएर बिक्री गर्दै आएको रहस्य खुलेको छ।

सीमित व्यापारीले कार्टेलिङ गर्दै दालको मूल्य बढाएका थिए। दसैंतिहारमा उपभोक्तालाई सहुलियत दिन दाल खरिद गरेर बिक्री गर्ने व्यवस्था मिलाएको एसटिसीका विभागीय प्रबन्धक ब्रजेशकुमार झाले बताए। 'दाल, चिनीलगायत अन्य दैनिक उपभोग्य वस्तुमा छुट दिँदा तुलनात्मक रुपमा बजार नियन्त्रणमा आएको छ,' झाले भने, 'असन्तुलित बजारमा मूल्यवृद्धि रोक्न सहयोग पुगेको छ।'

एसटिसीले १ सय २० रुपैयाँको पिठो ८६ रुपैयाँमा बिक्री गर्न थालेको छ। सरकारको निर्देशनअनुसार चिनीमा प्रतिकिलो ५, नुनमा २ रुपैयाँ छुट दिने घोषणा गरेको एसटिसीले दैनिक उपभोग्य वस्तुमा छुट दिएपछि सुपथ मूल्य पसलबाट उपभोक्ताले राहत पाएका छन्।

एसटिसीले उपत्यकाका ११ स्थान र घुम्ती पसल सञ्चालन गरेर सामान बेच्दै आएको छ। असोज १ गतेदेखि सञ्चालन गरेको सूपथ मूल्य पसलमा दैनिक २० लाखको दैनिक उपभोग्य सामग्री बिक्री भएको एसटिसीकी प्रमुख कार्यकारी अधिकृत उर्मिला श्रेष्ठले बताइन्। 'चिनीलगायत दैनिक उपयोग्य वस्तुबाट सर्वसाधारणले फाइदा लिएका छन्,' श्रेष्ठले भनिन्, 'सरकारी स्वामित्वको संस्था भएकाले उपभोक्तालाई राहत दिन निकै थोरै नाफा राखेर बिक्री गरिरहेका छौं।' यस अवधिमा करिब ३ करोड ४० लाख रुपैयाँको सामान बिक्री भएको छ।

यसमा तपाईको मत

फेसबुकबाट तपाईको प्रतिक्रिया

सम्बन्धित समाचार

icon