Sunday September 15, 2019 |

पोलिटेक्निकका कर्मचारीको आन्दोलन जारी

featured-news

बनेपा, २५ भदौ । काभ्रेपलाञ्चचोकको बनेपा नगरपालिका–५ आजादडाँडामा रेहको नेपाल–बनेपा पोलिटेक्निक इन्स्टिच्युटका कर्मचारी आन्दोलित भएका छन् ।

प्राविधिक शिक्षा तथा व्यावसायिक तालीम परिषद्अन्तर्गतको आङ्गिक शिक्षालय सो इन्स्टिच्युटमा कार्यरत पाँच करार सेवाका कर्मचारीको नियुक्ति म्याद थप नगरिएको भन्दै राष्ट्रिय कर्मचारी सङ्गठन (सीटिइभिटी) र कर्मचारी सङ्घ (सीटिइभिटी)ले संयुक्तरूपमा थालेको आन्दोलन जारी राखेका हुन् । कर्मचारीहरुले शिक्षालय प्रशासनद्धारा कर्मचारी हकहितविरुद्ध हुने गरी करार सेवामा कार्यरत केही कर्मचारीको नियुक्ति म्याद थप नगरिएपछि आन्दोलन गर्नुपरेको जनाएका छन् ।

दुवै सङ्गठनले संयुक्त विज्ञप्ति जारी गर्दै यही भदौ १९ गते सो विषयमा प्रशासनको ध्यानाकर्षण गराएका थिए । सो विज्ञप्तिको कुनै सुनुवाइ नगरेको र समस्या समाधानको विषयमा पनि कुनै वास्ता नगरेको भन्दै आन्दोलनमा उत्रनुपरेको कर्मचारीहरुले बताएका छन् ।

दुवै सङ्घ–सङ्गठनले विभिन्न माग राखेर तीन दिनदेखि आन्दोलन गरिरहेका छन् । जसअनुसार आज सम्पूर्ण कर्मचारीले पेनडाउन गर्ने कार्यक्रम रहेको जनाएको छ । सोमबार प्रशासन कार्यालय अगाडि कालोपट्टी बाँधेर एक घण्टा धर्ना दिएको थियो । त्यस्तै पहिलो दिन हातमा कालोपट्टी बाँधेर साङ्केतिक विरोध गरेका थिए ।

मागको सम्बोधन नगरे यही भदौ २८ गतेदेखि शिक्षालयमा तालाबन्दी गर्न बाध्य हुने विज्ञप्तीमा उल्लेख छ । इन्स्टिच्युटका प्रमुख मिस्टरकान्त मैनालीले बजेट कार्यक्रममा भएको सिलिङ र पदका लागि प्रस्तावित दरबन्दी सीमित भएका कारण म्याद थप गर्न नसकेको बताउनुभयो । “पदको अवस्थाअनुसार तीन जना मात्रै रहेकाले आठमध्ये पाँच जनाको म्याद थप गर्न सकेनौँ”, मैनालीले भन्नुभयो, “त्यस विषयमा भएको आन्दोलनको बारेमा माथि विभागमा जानकारी गराइसकिएको छ ।”

कर्मचारीले करारमा रहेका कर्मचारीमध्ये बाँकी रहेका कर्मचारीलाई तत्काल नियुक्तिपत्र दिने व्यवस्था मिलाउनुपर्ने, प्रशिक्षणतर्फको कर्मचारीको यस वर्षको नियुक्तिपत्रमा उल्लेखित बुँदा नं १४ खारेज गरी नयाँ नियुक्तिपत्र दिइनुपर्ने, प्रशिक्षणतर्फबाट कर्मचारीको हकमा शिक्षालय प्रमुख, शिक्षालय उपप्रमुख, शैक्षिक संयोजक तथा कोर्ष संयोजकले समेत नियमअनुसार पठनपाठन कार्यमा संलग्न हुनुपर्नेलगायतका माग रोखर आन्दोलन गरिहेका छन् । रासस

यसमा तपाईको मत

फेसबुकबाट तपाईको प्रतिक्रिया

सम्बन्धित समाचार

icon